Ervas dal matg - Margreta Solèr: «La natira è mia religiun»

Legenda: Margreta è adina pronta da dar tips a persunas interessadas vid ervas. RTR

«La natira ha mussa a mai da viver, ella ha mussà il savair gidar mamezza e mia figlia. Ella è la resposta sin bleras da mias dumondas. La natira è il lieu nua ch'jau hai chattà schliaziuns e forza per la vita. La natira è per mai la colliaziun cun tut quai che è, cun tut il cosmos», di Margreta Solèr. Sco ch'ins vesa: En la natira chatta Margreta Solèr quai ch'ella tschertga e ch'ella dovra per sa sentir bain.

audio

Quai è Margreta Solèr

02:34 min, ord Nossa cuschina dals 01.05.2024. Maletg: RTR

laschar ir. Durada: 2 minutas 34 Secundas.

Cura che jau vegn en il liber, è quai l'emprim pass en mes corp.

Margreta Solèr ha passentà parts da sia uffanza a Tarasp ed a Lumbrein en Lumnezia. Il talent e l'amur per las ervas haja ella ertà da sias nonas. Margreta Solèr ha 37 onns ed è educatura suletta da sia figlia Lena Sofia ch'ha 10 onns. Ensemen cun lur chaun e lur giat vivan ellas al ur dal vitg da Castrisch – in lieu idillic nua ch'ellas sa sentan fitg bain circumdadas da pradas e guaud.

In sguard sin las ervas

En nossa rubrica culinarica dal matg, ans declara Margreta Solèr chaussas interessantas davart la forza da quatter ervas e plantas: brumbels-pign, la flur-portg, il plantagen lung e la regina da las ervas: l'urticla.

L'urticla è la regina da las ervas, ella è in vair tresor per la sanadad.

En quel connex respunda ella dumondas sco: Pertge avain nus tantas flurs-portg sin nossas pradas la primavaira? Tge fan ellas cun la terra e tge fan quellas flurs melnas cun noss corp?

Margreta Solèr lavura sco turisticra e recepziunista en in hotel. Daspera producescha ella itgs, tés, tincturas e cremas, ielis per far bogn, ielis eterics e tuargias cun products naturals e biologics che creschan en ses conturn.

1 / 13

Legenda: Products naturals da Margreta per il diever quotidian Tuargias, cremas, sirup per la tuss, ielis eterics, tés e bler auter tutgan tar il sortiment da «Mägy». RTR

2 / 13

Legenda: Bain raccoltadas, bain conservadas ed appreziadas. Margreta Solèr dovra di per di ervas en cuschina. RTR

3 / 13

Legenda: Il sirup da la tuss «dragun da la tuss» è ina spezialitad. En ses sirup da la tuss ha Margreta Solér impundì tut sia savida ed amur. RTR

4 / 13

Legenda: Amur per il detagl. En cuschina da Margreta chattan ins dapertut ervas e products da la natira raccoltà e conservà sez. RTR

5 / 13

Legenda: L'urticla, la regina da las ervas. Tenor «Mägy» è il num da questa benedida planta betg giusifitgà. RTR

6 / 13

Legenda: Vesaivel e nizzaivel: Il placat da fluras ed ervas penda vid la parait en cuschina. RTR

7 / 13

Legenda: Margreta Solèr avant isch-chasa a Castrisch. Margreta è adina pronta da dar tips a persunas interessadas vid ervas. RTR

8 / 13

Legenda: Il murter è adina pront en cuschina. Sche quest murter pudess ans raquintar istorgias, lura fiss quai franc interessant ed aromatic. RTR

9 / 13

Legenda: La flur-portg ina damaun. La flur-portg ha las valurs da reducir aschadad da la terra, ma era da noss corp. RTR

10 / 13

Legenda: Urticlas da primavaira possedan valurs potentas. «L'urticla è la regina da las ervas – cunzunt era tar problems da vaschia tar umens», di Margreta Solèr. RTR

11 / 13

Legenda: Per Margreta è l'iert sco ina bella stiva che viva. Ussa che il sulegl è anavos giauda la dunna da 37 onns ses iert. RTR

12 / 13

Legenda: Brustgas da pign per far products naturals. Tuargia, sirup, ieli da bogn e auters products biologics producescha Margreta cun brustgas da pign. RTR

13 / 13

Legenda: Plantagen lung en verdegur. (Spitzwägerich) Questa erva ha ina forza antibacteriala ed è buna per far tincturas cunter piztgadas d'insects ed avieuls ed auters mals. RTR