A partir dal 2025 na dastgan profiturs betg pli sa preschentar durant il WEF – il forum mundial d'economia. Mo las firmas ch'èn vegnidas envidadas dal WEF, naziuns ed organisaziuns da non-profit survegnan in plaz sin la promenada da Tavau. Questa decisiun ed ulteriuras mesiras ha il «Kleiner Landrat» prendì unanimamain. Quai ha il Landamma da Tavau Philip Wilhelm communitgà envers l'agentura da novitads Keystone-SDA.
L'infrastructura sin la promenada a Tavau saja tenor la communicaziun uschè u uschia gia al limit durant il WEF. Per ils profiturs, ch'importan a radund in terz da tut ils preschents, n'haja simplamain nagina capacitad. Schizunt persunal da segirezza ha gì ils ultims onns adina dapli bregia da chattar letgs. Els hajan stuì vegnir mess sut tetg pli e pli lunsch davent dal WEF.
La decisiun duai gidar da reducir fenomens secundars – sco per exempel canera d'uras tardas – che stattan en connex cun preparaziuns da las plazzas sin la promenada pervi dal WEF. Gia per il WEF 2024 hai dà reglas pli strictas. Per dar a la vischnanca ulteriuras pussaivladads per mesiras anc pli restrictivas, dovri dentant in'adattaziun da la lescha da construcziun. Davart quella po il suveran votar ils 9 da zercladur.
