Il servetsch da salvament en il Grischun duai vegnir reorganisà. Sco la regenza grischuna scriva, vul ella reglar il servetsch detaglià en in'atgna lescha. La finamira saja che mintga persuna en il chantun che sa chatta en privel, è malsauna u ha gì in accident survegn spert ed optimal agid.
Da differents relaschs ad ina lescha cumplessiva
Ils ospitals publics han l'incumbensa da metter a disposiziun in servetsch da salvament sin via effizienta en lur regiun da sanadad. La nova lescha precisescha las incumbensas respectivas.
Ins ha per part fatg bunas experientschas che medis da chasa han lavurà en l'ospital regiunal durant lur servetschs d’urgenza.
Dentant èsi grev da decider tge lieu che fa segn per esser uschia spert sco pussaivel. Per exempel en la Surselva è il ospital regiunal Glion central. Ma sch’in medi u media da chasa da Sedrun arriva a Glion per il servetsch d’urgenza ed in clom d’urgenza vegn da Sedrun – alura dovra quai puspè temp.
Il factur da temp è adina in tema en il chantun, cunquai che nus na pudain betg avair en mintga val in post da salvament per quests paucs cloms chi dat en quest lieu.
La regenza duai era pudair far als ospitals prescripziuns areguard l'organisaziun da lur servetsch da salvament, sche quai è necessari per pudair garantir in servetsch da salvament effizient. Da nov vegn era reglada l'integraziun en il servetsch d'urgenza da las medias e dals medis che pratitgeschan libramain.
Oz èn las disposiziuns ch'èn decisivas per ils fatgs da salvament repartidas sin differents relaschs. En l'avegnir duain ils fatgs da salvament en il chantun dentant vegnir reglads a moda cumplessiva en in'atgna lescha. Quella lescha va uss en consultaziun fin la fin da fanadur.
Or da l'archiv:
