Sch'ins entra en la pensiun d'animals «Arche» a Cuira, aud'ins gia da lunsch a giappar ils chauns. Silja Patt, la manadra da la pensiun e hotel d'animals, ans salida cun in surrir. E quai, malgrà ch'ils ultims mais n'èn betg stads simpels: avunda spazi per ils animals, las finanzas e mancanza da persunal fan quittà.
Curt suenter vesain nus, quant pauc plaz che la pensiun d'animals ha propi. Davos pliras portas da vaider ans guardan egls gronds, e toppas sgrattan vi da la paraid. Silja Patt ans maina en ina da questas stanzas da giats.
Silja Patt avra la porta tar ina da las stanzas da gruppa. In giat cler brin cun cua naira siglia encunter ad ella. «Minnie», in giat chattà, senza dachasa.
Actualmain vivan 31 giats en la chasa d'animals. La maioritad fa vacanzas en l'hotel, ma 12 dad els n'han nagin possessur u possessura. Las persunas che portan lur giats en la pensiun d'animals sajan fitg differentas – uschè differents sco lur motivs, di Silja Patt.
Savens saja il motiv, ch'in novnaschì vegni latiers. Lura n'hajan las persunas betg pli temp per lur giats.
In auter factur impurtant saja la pandemia da corona, di Silja Patt.
Circa in onn suenter corona avain nus gì en ina giada blers giats ch'eran enturn in onn vegls, pia exact naschids durant il temp da corona – quels vegnivan lura consegnads.
Blers dattan puspè giu lur giats, sch'els n'èn betg pli uschè gnocs sco quai ch'els eran sco giattel – u la glieud s'accorscha, ch'ils giats dattan tuttina dapli lavur che spetgà.
Sper ils giats datti sin l'emprim plaun era ina stanza per auters animals. Là vivan reptils e ruiders. Il mument viva en la stanza gronda mo in gheco, tut sulet. En la stanza èsi ruassaivel – però da sutensi aud'ins canera.
Ils chauns en la pensiun d'animals
Silja Patt ans maina da stgala giu, nua ch'ils cloms dals chauns vegnan pli dad aut.
En l'auzada sut vivan 37 chauns, mintgin en sia atgna boxa. Sco era tar ils giats èn ils blers chauns en vacanzas en l'hotel Arche. Set dad els n'han dentant nagin dachasa. Las cifras per l'avegnir na vesan betg ora meglier tenor Silja Patt.
Il dumber da dumondas per dar giu chauns è s'augmentà massivamain ils ultims onns. Quai èn chauns vegls fin per part gia giuvens.
In da quests chauns senza chasa è «Ares». El è in terrier brin nair – cun in ventrigl alv. Sin ses nas ha el in tachel, che vesa ora in zichel sco in cor.
Silja Patt piglia Ares e va cun el giuadora. Ella gioga cun el, tirond ina balla. Ares ha grond plaschair e siglia enturn sin il prà.
In grond problem per ils chauns en la pensiun sajan ils pregiudizis, di la manadra. Savens vegnan ils chauns numnads «chauns da problems». Silja Patt è da l'idea che nagin animal naschia nausch – i dependia dals umans e da l'educaziun.
Ozendi pon ins empustar tut online – deplorablamain perfin chauns.
Tuttina quant frustrant che quai è, Silja Patt na perda betg la speranza. Sch'i daventa memia bler, sesa ella in temp en ina stanza da chauns e sa regorda, pertge ch'ella fa questa lavur. Per ils animals, per ils chauns – e per ch'els stettian bain.
