La fin da november 2023 ha l’entira cumissiun da bajegiar da la vischnanca da Mustér abditgà en globo sin la fin da l’onn. Sinaquai ha la suprastanza communala incumbensà la cumissiun da gestiun da sclerir las raschuns. Uss èn quels resultats sin maisa. Da crititgar n’ha la cumissiun da gestiun betg gì bler. Uschia sustegnia ella las respostas dal president communal fatgas ils 7 da december 2023. Sulet la legislaziun è vegnida crititgada. La suprastanza communala saja l’instanza da bajegiar en vischnanca, scriva la cumissiun da gestiun en ses rapport ed ella possia era incumbensar sias cumpetenzas a la cumissiun da bajegiar u ad in uffizi communal u regiunal. Ma ella na possia betg tenor la lescha da bajegiar communala, sco ella fa il mument, delegar questa cumpetenza al directori communal, scriva la cumissiun da gestiun. Dentant tenor la constituziun communala po la suprastanza delegar a la direcziun communala cumpetenzas finanzialas, persunalas ed ulteriurs fatgs da tempra operativa. Pia èn las leschas ed ordinaziuns vertentas per part cuntradictoricas.
Cumissiun da construcziun vuleva simplifitgar il manaschi
In dals puncts da critica da la cumissiun da construcziun era ch’ella vuleva simplifitgar il manaschi communal cun survegnir dapli cumpetenzas da decider. Quai n’ha la suprastanza betg fatg, anzi ella ha creà in ulteriur gremi cun il president communal, il gerà responsabel, il manader d’infrastructura ed il manader da l’uffizi da construcziun. Quai gremi è ina instanza supplementara ch'ha tenor situaziun gia anticipà decisiuns avant che la cumissiun da construcziun ha pudì far sia lavur, quai saja betg necessari e na correspundia betg a las leschas communalas, scriva la cumissiun da gestiun en ses rapport.
Cumissiun da construcziun decideva, enstagl da proponer
In punct che la cumissiun da gestiun ha constatà cun examinar las fatschentas decididas il 2023 è che la cumissiun da bajegiar prendeva decisiuns, enstagl da mo proponer tge decider. Quai saja surtut problematic sche la cumissiun da bajegiar na pudeva betg s’identifitgar cun las decisiuns prendidas da las instanzas responsablas. Quai n’haja betg fatg pli simpla la situaziun, anzi, ha la cumissiun da gestiun declerà a la seduta dal parlament communal.
Protocols èn corrects
Ina renfatscha ch’ins n’ha betg pudì cumprovar è che protocols sajan vegnids midads ed uschia sfalsifitgads. Qua n’ha la cumissiun da gestiun betg chattà indizis, uschia hajan tut ils gremis controllads approvà e protocollà las sedutas senza midar ils protocols. En tut èn vegnidas examinadas 127 fatschentas da l’onn 2023, tractadas durant 18 sedutas. Il directori communal ha tar pli pauc che 10 fatschentas fatg midadas u amplificaziuns e dà vinavant ellas a la suprastanza communala. La plipart è vegnida approvada sco la cumissiun da bajegiar ha proponì, scriva la cumissiun da gestiun.
Restructuraziun e reorganisaziun da l’administraziun
In dals puncts che la cumissiun da gestiun ha crititgà è ch’ils pensums en l’administraziun na vegnan betg definids cun in pensum da duers. Pia manca in sistem da controlla intern, confurm a las pretensiuns chantunalas, scriva la cumissiun da gestiun. La vischnanca ha perquai gia inoltrà communabel cun ina interpresa externa ina reorganisaziun da l’entira administraziun communala. Ils resultats da questa examinaziun duajan vegnir preschentads en la proxima seduta dal parlament communal il zercladur.
