Las vischnancas grischunas duain puspè prender sezzas las hottas enta maun tar las ovras idraulicas, sch’i va tenor la nova strategia dal chantun. Cunquai ch’ina gronda part da las concessiuns scadan ils proxims onns ston las vischnancas decider da nov sch’ellas vulan prolungar quellas u sch’ellas vulan nizzegiar sezzas il potenzial.
Nagin «Heimfall»
La vischnanca da Trin cun sia ovra idraulica «Pintrun» è confruntada sco ina da las emprimas cun quella decisiun. Il mardi saira è la populaziun vegnida infurmada davart ils plans da la suprastanza. Quels prevesan da desister da l’uschenumnà «Heimfall» e d’enstagl fundar ina societad d'aczias. In nov model ch'ha duvrà intensivas tractativas ils ultims dus onns, però era lavur da piunier.
Nov model cun societad d'aczias
Cun quest nov model ch'è vegnì elavurà cun il chantun vul la vischnanca ussa sezza nizzegiar il potenzial da l’ovra idraulica sco acziunaria principala cun 70%. Persuenter sto ella investir 1,05 milliuns francs e pajar 500’000 francs indemnisaziuns al chantun ch’è sa participà cun 10%. Ils ulteriurs 20% tutgan a l’Axpo Hydro Surselva che surdat ils stabiliments a la societad e paja 1,2 milliuns francs per far investiziuns. La concessiun d’aua vegn prolungada per 60 onns.
Tge sa mida?
La producenta d'energia sto surdar l'ovra a la societad d'aczias. Per il manaschi da l'Axpo Hydro Surselva na sa mida però nagut.
Per ils collavuraturs da la Surselva na sa mida da princip nagut. Els fan vinavant la lavur da mantegniment e da manaschi cun il persunal local. Las plazzas da lavur restan uschia en la Surselva.
Midadas datti però per la vischnanca. Sco acziunaria principala surpiglia ella numnadamain la responsabladad finanziala per l'entir manaschi. Quai che n'è betg mo cumbinà cun novas schanzas, mabain era cun malsegirezzas.
La pli gronda ristga è adina ch'ins na po betg vesair ordavant tge che la fiera d'energia fa. En il mender cas produceschan ins pli char che quai ch'ins vegn da vender l'energia e lura ston ins pajar suren.
La populaziun da Trin decida ils 27 da matg davart il project. Per quel sto vegnir approvà in credit da 1,55 milliuns francs.
