La lescha da transplantaziun sa mida – il 2022 ha il suveran ditg gea a la midada da la lescha da transplantaziun. Quella prevesa da midar il sistem actual: En l’avegnir è mintga persuna ina donatura potenziala, sch’ella n’ha betg declerà explicit ch’ella na vul betg metter a disposiziun ses organs. Il Cussegl federal ha uss tramess en consultaziun l’ordinaziun che regla ils detagls.
Nov register per nudar la decisiun persunala
I duai vegnir stgaffì in register en il qual tuttas persunas pon nudar lur voluntad – pia sch'i vulan u na vulan betg dar vinavant lur organs suenter la mort. Plinavant duai er esser pussaivel da restrenscher la donaziun sin mo tscherts organs.
Il register duai esser accessibels a moda nuncumplitgada, uschia ch'igl è pussaivel da midar sias indicaziuns da tut il temp. Per garantir che mintga persuna vegn identifitgada correctamain propona il Cussegl federal da duvrar l'identitad electronica – la e.ID – che duess vegnir realisada en circa dus onns. Sper il register electronic duai era vinavant esser pussaivel da duvrar in attest da donatur en furma scritta.
La parentella duai vegnir consultada sche la voluntad da la persuna n'è betg enconuschenta. I resta vinavant pussaivel che la parentella scumonda transplantaziuns, sch'els san che la persuna n'avess betg vulì quai.
L'ordinaziun reglescha ils termins legals. Enfin la fin da l'avust pon organisaziuns e partidas prender posiziun.
2023 è stà in onn da records per Swisstransplant
En Svizra hai anc mai dà uschè bleras transplantaziuns d'organs sco l'onn passà. 675 persunas – ch'eran sin la glista da spetga – han retschavì il 2023 l'organ ch'i duvravan urgentamain. Quai ha Swisstransplant communitgà.
Ma era las donaziuns d'organs han cuntanschì in nov record: en tut 200 organs èn vegnì donads en l'onn passà. Quai saja tenor Swisstransplant ina cifra fitg auta, oravant tut sch'ins resguarda che 58% da la parentella da tuts donaturs potenzials èn per regla cunter ina donaziun dals organs.
