El era il retg dals pilots dad auto. Il prim da matg 1994 è dentant ì a fin la vita d’Ayrton Senna. Il Brasilian, figl d’ina famiglia bainstanta da Sao Paulo, era dapli che be in pilot da la furmla 1. Senna era ina persuna religiusa, intelligenta e plain respect. El sunava clavazin, rimnava art e legeva cudeschs da Shakespeare. Ed el fascheva cursas dad auto, meglier, pli spert, pli spectacular e pli ristgus che auters. 1988, 1990 e 1991 è Senna daventà trais giadas campiun mundial da la furmla 1.
Cun tempo orrent en in mir da betun
Al GP da San Marino ad Imola il 1994 èsi capità. Cun in tempo da passa 200 kilometers l’ura è Ayrton Senna charrà en la setavla runda cun ses Williams FW16 frontal en in mir da betun, quai en la curva Tamburello. Cun grevas blessuras e senza schientscha è il Brasilian vegnì transportà en l’ospital a Bologna. Senna n’ha dentant gì nagina schanza da surviver quest accident tragic. Gia il di avant en la qualificaziun era l’Austriac Roland Ratzenberger sa disgrazià mortalmain sin questa pista.
Per il collega d’equipa d’Ayrton Senna, l’Austriac Gerhard Berger, è la mort dal superstar brasilian uschia sco sch’il sulegl fiss crudà da tschiel. Fin oz è Senna ina inspiraziun per blers, in idol en la classa roiala dad autos e daditg in mitus.