Igl è stà l'entschatta mars cura che l'EHC Cuira ha fixà la promoziun en la Swiss League, la segund auta liga svizra. Dapi quest mument vegn lavurà intensiv davos las culissas per preparar il club sin la nova sfida. Ina da las persunas involvidas davos las culissas è Björn Gerhard, ch'è il schef da sport da l'EHC Cuira.
Davent da renovaziuns, daners fin tar novs giugaders
Ch'i buffa in auter vent en la Swiss League è cler a tut ils responsabels. Quai mussa gia il fatg che l'EHC Cuira ha stuì vegnir midà en ina societad d'aczias per insumma pudair dar hockey sin glatsch en la segund auta liga svizra. Er il budget sto vegnir auzà per in milliun francs sin 2,5 fin 3 milliuns francs. Ed en il stadion stoi dar intginas renovaziuns sin che la stagiun cumenza mez settember. Dapertut sajan ins dentant sin fitg buna via.
Blers telefons, bleras sesidas. Gea, i saja actualmain in temp intensiv, di Björn Gerhard. Ma en il medem mument er in bel temp.
Igl è in temp fitg intensiv, ma l'entira lavur fa era fitg grond plaschair. Nus essan in super team.
La lavur principala da Björn Gerhard è actualmain da chattar giugaders per la nova stagiun. L'equipa da Cuira vegn numnadamain a guardar ora auter en la nova stagiun. Betg tut ils giugaders sajan numnadamein pronts da dar hockey sin niveau professiunal en la Swiss League. Ensemen cun ils trenaders Reto e Jan Von Arx è Björn Gerhard actualmain vi da tschertgar giugaders ch'èn in rinforzament. Era da dus giugaders esters ch'èn lubids en la Swiss League. Il schef da sport da 32 onns tradescha dentant era che fitg blers giugaders ed agents da giugaders s'annunzian tar l'EHC Cuira per dir ch'i giugassan gugent per il club.
Nus laschain temp da metter ensemen l'equipa. L'equipa finala vegnin nus probabel pir ad avair curt avant il campiunadi.
Era quai che pertutga l'equipa per la nova stagiun è Björgn Gerhard optimistic. Els sajan sin buna via da metter ensemen in'equipa cun giugaders ch'eran gia ils ultims onns part da l'equipa e cun novs giugaders. Sin mez settember cur ch'i va liber cun il campiunadi sajan els pronts, empermetta il schef da sport. E quai sin sco era sper il glatsch.
